قصيدة الموت البطىء للشاعر راضى على أحمد حسين
الحزن موت بطئ
بينخر فى الجسد
منشاربيقطع فى الشجر
ميه بتنحت فى الحجر
لازم يدوب
الحزن لص جرئ
بيحب الظلام
بيستنى الغروب
يعدى ويمر
يتسلل للقلوب
يسرق الفرحة
يسيب الآلام
يزرع دموع بطعم المر
يخطف الضحكة البريئة
من فوق الشفايف
يملا الوحوش الجريئة
رجايف
ياما شباب م الحزن شاب
بقى مجروح
مكسور جناح وروح
مش عارف فين يروح
مقفول فى وشه كل باب
دا الحزن خيط طويل بيكر
خريف بيقصف
زهور العمر
يجيب المرض
زى الديون
بياخد نورالعيون
مهما تكون سُمر
الحزن سوس وفيروس
بياكل فى النفوس
ولو عشعش فى المكان
يحفظ كل الدروب
يتشعبط ع الحيطان
يولد فى الغيطان
دود
ياكل كل الورود
نار بتحرق خضار وتضر
يخلى الحياة بلون العذاب
مش ممكن منه تلاقى هروب
غير بسر وحيد
فريد
ينسف الهم مهما شديد
يزيل الكروب
يداوى القلوب
وتلقى الحياة بتسر
"ذكر الله"