مستلزمات الرضاعة لطفلك فى العام الأول من عمره
-------------------------------------------

دى مهم جدا تجيبى ماركة معروفة و نضيفة 
اولا لانها هتأثر على صحة البيبى
و كمان عشان تعيش معاكى مدة طويلة
و ابعدى عن الحاجات الرخيصة اللى بتتباع ف محلات 2ونص و لا العربيات اللى ف الشارع
ولا المنتجات اللى مش معروف مصدرها دى


1- الرضاعة

- طبعا مش هاوصيكى ... الرضاعة الطبيعية مهمة جدااااااا ليكى و للبيبى
ماتستغنيش عنها الا لسبب قهرى
و البيبى لحد 6 شهور من عمره مش بيحتاج اى حاجة غير لبن الأم
ولا مية و لا اعشاب ولا اى كلام من ده

- فى امهات مثلا اللبن مش بيبقى كافى فى صدرها
ف بتحتاج تديله رضعات لبن من برة مع اللبن بتاعها
و هنا بنلاقى مشكلة 
ان البيبى بيلاقى الببرونة اسهل و اسرع ف الرضاعة ف يحبها و يسيب صدر الام
و احنا طبعا مش عايزين ده يحصل

عشان كده فى ببرونة صممت مخصوص لتفادى المشكلة دى 
بتبقى شبه ثدى الام بالظبط ف الطفل كأنه بيرضع طبيعى
ده شكلها


ع اليمين و هى متغطية و ع الشمال و هى مفتوحة
و فى منها تلات احجام صغير و وسط و كبير
الماركة دى اسمها Mimijumi
ممكن ماتلاقيهاش بسهولة ف القاهرة
بس فى حد سأل لى و قالى موجودة ف صيدلية عماد الدين ف مدينة نصر ب113ج 
بس انا لسة مارحتش جبتها الصراحة

و دى صورة البيبى و هو بيرضع منها كأنه بيرضع طبيعى بالظبط




فى ماركة Chicco بردو عاملة حاجة شبه كده
انتى بتجيبى ببرونة واحدة و تلات قطع بتتركب عليها
اول قطعة دى للبيبى اللى لسة مولود
ده شكلها


تانى قطعة للبيبى اكبر من شهرين


تالت قطعة للبيبى اكبر من ست شهور


و دول الفرق بينهم فى درجة ميل الحلمة و فى سرعة نزول اللبن من الببرونة


و بردو ماركة Avent حلوة و مشهورة جدا و متوفرة ف كل مكان 



لو هاتجيبى اى ماركة تانية من الصيدلية شوفى النصايح دى :

- الزجاج اسهل فى التنظيف لكن أتقل ف الوزن و ممكن تتشرخ لو اتخبطت جامد

- البلاستيك أخف فى الوزن لكن اصعب ف النضافة ، و هى اه مش بتتكسر بسهولة بس بردو مش بتعيش كتير يعنى لازم تغيريها كل فترة ، ولازم تتأكدى انها خالية من مادة BPA 
اقرأى الكلام اللى عليها كويس

- فى نوع بيجمع بين الاتنين .. زجاج بس خفيف و مابيتكسرش و يتحمل الغليان عشان التعقيم .. ده مناسب

- الحلمة نفسها افضل انها تكون من السليكون لانه بيعيش اطول مش بيتقطع بسهولة


2- اللهاية او السكاتة 

- لو ناوية تستخدميها ان شاء الله يبقى تاخدى بالك من الحاجات دى :

- تكون مناسبة لسن البيبى لان فى منها احجام ، و الحجم الكبير ماينفعش لفم البيبى الصغير و هكذا

- بالنسبة للخامة فى نوعين :
النوع البلاستيك العادى المشهور اللى زى ده


و النوع السليكون اللى زى ده


طبعا السليكون افضل و بيعيش اكتر

- بالنسبة لشكل الحلمة نفسه بردو فى نوعين
نوع حلمة مدورة زى البلاستيك اللى انا حطيت صورتها دى
و نوع حلمة مشطوفة كده زى دى


التانية دى افضل و اريح للبيبى

- بالنسبة لتصميم السكاتة نفسها بردو فى نوعين
نوع بيبقى غطا السكاتة منفصل عنها زى اخر صورة دى
و نوع بيبقى غطاها منها فيها اسمها auto-close زى دى


طبعا النوع التانى احسن
عشان اول ما تتشال من بؤ البيبى تتقفل ع طول و ماتبقاش عرضة للتلوث

يبقى الخلاصة من التلات نقط دول
سكاتة سليكون حجم مناسب بحلمة مشطوفة و غطا منها فيها 


3- العضاضة

دى بتحتاجيها بداية من 4-6 شهور على حسب الطفل ما يبدأ التسنين
و ده بيسبب ألم للطفل ف اللثة و بيحتاج يعض اى حاجة
حتى تلاقيه بيعضك انتى شخصيا 

فى منها نوعين
نوع بيبقى جواه مية او جل زى كده


و نوع بيبقى مطاطى مصمت زى كده


النوع الاول افضل من التانى 
لانك ممكن تحطيه ف التلاجة فيحتفظ بدرجة برودة لمدة معقولة
البرودة دى بتسكن الالم فى لثة البيبى لما يجى يعضها
بس اختارى نوع متين عشان ماتتقطعش منه