من الحاجات المهمة جدا العناية بالمنطقة الحساسة عشان تفضل نضيفة وكمان ملهاش ريحة مش كويسة

ودي طريقة للي مش عندهم وقت او بيكسلوا او الامهات المشغولة ، طريقة سهلة وسريعة ونتيجتها احسن من الخلطات والبلاوي الكتير اللي بتاخد وقت وفلوس بالهبل 

النظافة والرائحة

انا من فترة جاتلي التهابات في المنطقة وبعد ما سمعت النصايح وجربت حاجات كتير اكتشفت طريقة بسيطة للعناية بالمنطقة دي والحفاظ عليها بدون اي مجهود يذكر للامهات وحتى للآنسات 


1- ازالة الشعر طبعا والانسات واللي بيتعبوا من السويت ممكن يقصو الشعر بالمقص عشان ميبئاش طويل انما الموس لازم تعمليه يوم ويوم ولازم فوم ولازم مطرهات وكريمات بعده يعني مينفعش تعملي بالموس مرة كل فين وفين لان الشعر لما بيطلع بيكون خشن شوية وممكن يعمل حبوب وبلاوي ، هابئى انزل موضوع خاص بالحلاقة فقط باذن الله لو عايزين يا فتوكات


2- المطهر سيتيال ، دة تحفه يا بنات وبيستخدمه احسن الدكاترة وملوش اي اضرار دة بيستخدم في حالات الولادة كمان وعلى الجروح وآمن تماما وحاجة نضيفة اوي وتمنها كويس جدا .


يوميا تستخدميه بعد كل بيبي ، تحطي منه 1 سم على النص لتر وتخليه في ازازه وكل ما تدخلي الحمام تعملي بيبي بعد ما تتشطفي اعزكم الله تستخدمية ، انا حطاه في ازازه بخاخ 


وارش بيه على المنقطة الحساسة كلها يعني لازم ميجيش على البشرة الخارجية البيضا فقط او اللي هي بشرة الجسم بس لأ لازم ييجي على البشرة الداخلية كمان يارب تكونوا فهمتوا قصدي 

طب لو انتي برة تعملي اية بعد ما تتشطفي كويس بتخلي معاكي دايما مناديل من ديتول شبه المناديل المعطرة بس دي من ديتول وفيها معقم ديتول بتمسحي بيها بالراحة 



او تخلي معاكي ازازة صغيرة بخاخ بتاعة ريحة وخلصت مثلا تحطي فيها السيتيال على شوية مية ترشي ع المنديل وتمسحي 


، وطبعا تستخدمي احتياطات الامن قبل ما تستخدمي التواليت يا تستخدمي اكياس الخاصة بالتواليت


وفي شبهها في مترو بس اكياس بلاستيك شفاف زي دي 

او تحطي ورق او تجيبي اكياس من عندك تخليها في الشنطة وتكون مقطعة بالطول وتحطيها على التواليت عشان النظافة انا كتير بعمل كدة 

و تستخدمي التواليت بالطريقة دي وصدقوني ارخم من الارف اللي ممكن نعد عليه 

ههههههههههههههههههههه والله بعملها او اقف ويكون التواليت بين رجليا رجل هنا ورجل هنا وانزل سنة بجسمي شبه الصورة برضة واعمل ، لان بصراحة التواليت بيكون معفن وبكون مضطرة اعمل اية ، اعمل على روحي 

2- لازم نجفف المنطقة تماما بعد كل مرة ندخل نعمل بي بي كويس جدا ويفضل بمناديل تكون مغلفة بلاش اللي بتتفتح وتتحط جنب التواليت دي مش بستريحلها وهي مفتوحة كدة معرضة للهوا عشان بتلم اكيد بكتيريا وفطريات 


خليها في الكيس بتاعها مغلفة كدة او انتي حطيها في كيس وسيبي اللي جنب التواليت دي للضيوف 


3- اوليف زنك ، دة تحفه للالتهابات اللي بتكون في المنطقة دي لو نازلة في الحر وهاتمشي كتير حطي منه طبقة واستنى الجسم يشربها تماما 


وبعدين حطي بودرة الاطفال


والبسي شورت تحت الجيب طبعا بس يكون قطن 

في انواع كتير وممكن من قطونيل ب32 جنية وبيعيش مش اقل من سنة 



وانزلي مش هايحصل اي التهابات ولا ريحة عرق ولا اي روائح مش كويسة واول ما ترجعي البيت تعمل خطوة رقم 2 ضروري 


لو عملتي الخطوات دي انك تستخدمي سيتيال يوميا و تجففي المنطقة كويس جدا و تستخدمي الاوليف زينك والبودرة لو نازلة مشوار في الحر او لو حصلك التهاب لاقدر الله ، هاتبئى المنطقة نضيفة تماما مفيهاش اي روايح نهائي وعلى ضمانتي 

البياض بئى 

كل ما تدخلي تاخدي شاور لازم تعملي تقشير للمنطقة بسيط بالليفة ودة يبئى كل يوم ، ولو يوم ويوم او يوم اه ويومين لا ممكن تستخدمي ملح الحليب


او بيكربونات الصودا بتقولي للعطار يديكي ب3 جنية مثلا بيكربوناتو اللي هي بتتحط على الطعمية طبعا بتنخلية كويس قبل ما تستخدميه 

، بتبلي المنطقة وتحطي بايدك كدة على المنطقة من برة بس واقصد البشرة البيضا بس او الجلد لان المنطقة من جوه حساسة اوي وتسيبوها 5 دقايق وبعدين تدعكي بالراحة باسفنجة مش بالليفة



لان اللليفة هاتكون ناشفة عليها اوي بوجود الحاجات دي
وبس كدة

وبعد ما تطلعي من الشاور تستخدمي اللوشن الطبيعية دة ( ليمون + زبادي بلدي + لبن بودرة + معلقة خل ( اختيارية ) 

هاتحطي نص علبة زبادي البلدي اللي بجنية ونص او 175 وعليها معلقة اكل لبن بودرة ، هاتي الكيس ابو جني وربع ، او معلقتين لو هاتحطي خل و تعصري ليمون لحد ما يكون القوام شبة اللوشن يعني كريم بس قوامة سائل الى حد ما

والخلطة دي بالكمية دي هاتكفيكي على الاقل اسبوعين انا بتكفيني شهر 

وتحطيه في اي علبه لوشن قديمة او كريم ، وبعد الشاور تدهني منه كانك كريم بالظبط ، والجسم هايشربة ولا بئى تعدي تستني ينشف وبعد كدة تمسحيه ، لا دة كانك بتستخدمي كريم بالظبط 

ولو مش هاتحطي في الخلطة اللي فاتت دي الخل ، يبئى كل يوم الصبح اول ما تصحي من النوم مع روتين اليومي لوشك وانتي بتغسلية بقطنة ومن ازازة بخاخ تكون حطه فيها الخل ترشي على القطنة وتمسحي بيها المنطقة كلها ع السريع كدة 

ومع المداومة هاتلاقي السواد بدأ يقل بس هياخد وقت لانها حاجات طبيعية ودة مش كورس مكثف للتبييض هابئى انزل الكورس دة برضة لو حد عايز يا بنات ولو انتي السواد بسيط اوي هايقل بسرعة وهيحافظ على النتيجة اللي هاتوصليلها الى الابد وعمرك ما تشتكي من سواد ابدا ابدا ابدا 

دة روتيني اليومي وفعلا السواد قل جدا بئى حاجة بسيطة ومستمرة لانه بئى روتين واتعودت عليه 

التعطير 

ودة بيكون اهم طبعا للمتزوجات وممكن البنات بعد البريود عشان الروايح
وبرضة هانزل توبيك ازاي تعتني بالمنطقة دي في الفترة دي لو عايزين برضة


عشان الريحة بئى ، احسن حاجة المسك 

او زيت المسك الابيض او الاسود 



والعود 



و العنبر 


او الصندل 

او ماء الورد بس بلاش بتاع نيفيا اللي عليه الوان دة هاتي من عطار كويس وحاجة نضيف


او زيت فل وياسمين من الكابتن

المهم تكون زيوت طبيعية مية في المية

والحاجات دي هتلاقيها عند عطار كبير زي حراز والازازة كام ملي تكفيكي شهر لانك بتستخدمي نقط بس 

انا مش بحب الحاجات الصناعية خالص لو هاتستخدمي زيوت يادوب بمنديل وتحطي نقطتين وتمسحي بيهم المنطقة او بصوابعك بعد ما تكون غسلتي ايدك كويس ، او ممكن تستخدمي التبخير للجسم كله هايعطر المنطقة كمان ، وبلاش تستخدموا البودرة اللي فيها روايح او حتى معطرات المناطق دي او الغسول اللي فيه روايح عشان الروايح دي ممكن تكون مضرة على بشرتك ، في بنات بتحط نقطتين في الاندر وير بتاعها 


ودي حلوة جدا برضة عشان الريحة بتمسك في الهدوم وتفضل معطرة المنطقة على طول ، والبنات اللي بتستخدم الفوط الصحية اليومية بتحط في الفوط الصحية اليومية بتاعتها 


اعتقد كدة يا جماعة انا حلتلكم كل المشاكل مفيش ريحة وحشة ومفيش التهابات ولا اي مشاكل ومفيش سمار وكمان التعطير 

وكله تجربة شخصية وبجد هاتعدولي بس التزموا بالكلام دة بالظبط وبعد كدة هاتتعودي ويكون روتين ودي حاجات مش هتاخد منك كل يوم كام دقيقة