مستلزمات العناية بالشعر و البشرة لطفلك فى السنة الأولى
--------------------------------------------------

نبدأ واحدة واحدة من عند راس البيبى فوق
طبعا هاتحتاجى تجيبى مشط و فرشاة شعر
غالبا بيبقوا الاتنين مع بعض طقم واحد كده

- بالنسبة للمشط
خلى بالك ان اسنان المشط تكون نهاياته مدورة زى كده عشان ماتجرحش جلد الراس لانه بيكون رقيق جدا



- بالنسبة للفرشاة
لازم تكون ناعمة جدا .. و لو قدرتى تجربيها على جلد ايدك قبل ما تجيبيها جربى
لان اغلب الفرش الموجودة ناشفة للاسف

افضل ماركة لقيتها و لقيت اجماع على ان فرشتها ناعمة جدا و حلوة
هى ماركة شيكو




- نيجى للشامبو
لازم تتأكدى انه خالى من مادة " صوديوم لوريل سلفات " 
و هاتلاقى الشركة بتكتب اختصارها بالانجليزى ف المكونات SLS
لانها مضرة سواء كبار و صغار
و للاسف سمعت انها موجودة ف شامبو جونسون للاطفال 
ده غير الشكاوى الكتير انه بينشف الشعر

تانى حاجة تتأكدى منها انه يكون وسط حمضى اقل من 6
هاتلاقى بالانجليزى مكتوب pH= كذا
و ده اللى بيكون ملائم لجلد البيبى

و بعد بحث و تدقيق لقيت ان افضل منتج هو شامبو سيباميد

و هتلاقى مكتوب عليه pH=5.5

و بعده شامبو سانوسان


و بيقولوا بردو شامبو بايجن حلو 



- بعدين هانلاقى سائل الاستحمام و زيت الاطفال و اللوشن و الكريم و مرهم الوقاية من التسلخات و مناديل تغيير الحفاض
ممكن تجيبى المجموعة الكاملة من نفس ماركة الشامبو و تريحى نفسك





طبعا ممكن تستغنى عن حاجات من المجموعة
انا هاقولك نبذة بسيطة عن كل حاجة و انتى قررى

1- shampoo
ده الشامبو مخصوص لغسيل الشعر و فروة الراس

2- baby wash
ده سائل الاستحمام زى الشاور جل كده للجسم يعنى

3- baby lotion
ده لترطيب الجسم بعد الشاور

4- baby bubble bath
ده اللى بيعمل فقاقيع او رغاوى ف البانيو .. منظر يعنى مش اكتر

5- baby cleansing bar
دى صابونة تنظيف
مثلا لما تيجى تغيريله الحفاض تنظفيه بالماء و الصابون

6- baby whips
دى مناديل مبللة بصابون
بتستخدميها اثناء تغيير الحفاض خارج البيت تنظفى بيها جلد البيبى
او حتى تمسحيله ايده قبل الاكل 
لازم تاخدى بالك انها تكون خالية من الكحول 
هاتلاقى مكتوب عليها بالانجليزى Alcohol free

7- diaper rash cream
ده كريم للوقاية من التهاب الحفاض و التسلخات

8- baby cream
ده كريم مرطب لترطيب بشرة الوجه او الايد مثلا خصوصا ف الشتاء
و بردو ال baby oil بيستخدم للترطيب بس اكتر للجسم عشان بيبقى سهل ف التوزيع عن الكريم
و فى منه بروايح فبيكون ترطيب و تعطير ف نفس الوقت

- بالنسبة للاستحمام
اول كام شهر البيبى طبعا بيبقى صغنون و صعب تشيليه و تحميه لوحدك
ف ممكن تستخدمى اسفنجة الاستحمام اللى زى دى


تحطى عليها البيبى ف البانيو
و تحميه براحتك

و لما يكبر شوية ممكن تبقى تستخدى بانيو الاطفال بقة


- للعناية بالاظافر هتحتاجى قصافة او مقص
لو هاتجيبى المقص يبقى لازم تتأكدى انه صغير و ان الحواف بتاعته مدورة مش حادة
يعنى زى ده


لو بتفضلى القصافة
هاتى واحدة تكون مريحة ليكى و انتى ماسكاها ف ايدك 
لان هاتلاقى منها انواع كتير زى


و فى انواع بيبقى فيها عدسة مكبرة عشان انتو عارفين اصابع البيبى بتبقى نونو خاالص يعنى